লিমাৰিক – (প্ৰসংগ ডাকব্যৱস্থা)

ৰচনাকাল – ১৬ অক্টোবৰ, ২০২২

(১)
সাধু সাধু সাধু খাই কঠালৰ বাদু
ঘূৰণীয়া পৃথিৱীত খেলি হাই-গুদু
যদিহে পাইছা আহৰি
চাবলৈ নাযাবা পাহৰি
কেৰেলাতকৈ গুটি দীৰ্ঘ হোৱাৰ যাদু।

(২)
দেশৰ কথা দহৰ কথা শুনিছানে বাৰু
ডাক পখিলী বাইৰ দুই হাতত খাৰু
থাকে লিৰিকি-বিদাৰি
হাতৰ নাই আহৰি
টোপোলাতে মৰহে সেয়ে সুগন্ধি সোণাৰু।

(৩)
বাটৰুৱা বতাহজাক কেনিনো বৈ যায়
পথৰ ভাণ্ডা-মুণ্ড কেনেকৈনো বুজি পায়
নুবুজিবা নুবুজিবা
নাভাবিবা নুগুণিবা
ভাত মুদা মৰিলে জীৱৰ হ’ব যে বিলায়।

(৪)
যতমানে নিয়ম-নীতি মাজত নাই সাঁকো
কাৰ্যকৰীৰ বিসংগতি চাবলৈ নাই চকু
চলাই আছে গৰু-গাড়ী
হাতত পিন্ধে ডিজি-ঘড়ী
ভাৱলেশহীনতাৰে খেলি থাকে লুকা-ভাকু।

(৫)
মধ্যবিত্ত-সাধাৰণ কিমানৰ যে আপদত
আজিও একমাত্ৰ সাৰথি কত শত সময়ত
চিন্তানো কিয় কৰে হে’
সম্পদ নহয়, সময়হে!
কি আহে কি যায় এই দুদিনীয়া জীৱনত।